Bag-ong nakagawas sa Cebu City Jail nasikop og balik human nanulis sa dan C. Padilla, Barangay Duljo Fatima, dakbayan sa Sugbo, alas 12:10 sa kaadlawon, sa Dominggo, Marso 10, 2024
Si John Kevin Dingcong Doble,35, dunay kapuyo, taga Sitio Tinabangay, Brgy. Mambaling, dakbayan sa Sugbo, nadakpan sa mga estambay ug barangay tanod.
Ang biktima giila nga si Aniah Flicter Tabada, 19, tinun-an sa kolehiyo, taga Brgy. Basak San Nicolas, Dakbayan sa Sugbo.
Ang biktima nagsakay sa PUJ paingon sa Dalan Colon ug ang suspek iyang kasakay.
Sa pag-abot sa nahisgutang lugar, gitiunan siya og gunting sa suspek ug nideklar og tulis. Gikuha ang cellphone sa biktima nga mobalor og P10,000.
Apan nangayo og panabang ang biktima sa mga tawo sa palibot. Nakabantay ang mga estambay ug mga barangay tanod, nahitabo ang ginukdanay ug nasikop ang suspek.
KAWAD-ON
Si Doble nga nahinabi sa Superbalita Cebu sa Lunes, Marso 11, niangkon sa krimen nga iyang nahimo tungod sa giingon nga kawad-on busa naahat siya sa pagpanulis.
Kon wala pa siya madakpi, dason sa suspek, palitan niya og pagkaon ang iyang tulo ka mga anak ug kapuyo.
Sumala pa niya nga usa ka semana pa lang siya sukad nakagawas sa bilanggoan.
Napulo ka tuig niyang giserbisyuhan ang mga kaso.
Napriso siya tungod sa pagpanulis ingon man kalapasan sa ilegal nga drugas.
Ika-walo na kini niyang higayon nga nanulis, dugang sa suspek. / GPL