Bag-ong gikasal nawad-a’g P100K

MOTORSIKLO: Kini ang motorsiklo nga gi-park atubangan sa Simbahang Katoliko sa lungsod sa Malabuyoc diin gibutang sa u-box ang P100,00 nga gikawat, Huwebes, Marso 7, 2024. / Kapulisan sa Malabuyoc
MOTORSIKLO: Kini ang motorsiklo nga gi-park atubangan sa Simbahang Katoliko sa lungsod sa Malabuyoc diin gibutang sa u-box ang P100,00 nga gikawat, Huwebes, Marso 7, 2024. / Kapulisan sa Malabuyoc

Bag-ong kasal wala na molahos sa plano nga honeymoon human gikawatan og P100,000 atol sa adlaw sa ilang pagkasal sa Brgy. Pob­lacion 2, lungsod sa Malabu­yoc, Huwebes, Marso 7, 2024.

Si Police Senior Master Sgt. Ronidilo Duerme, imbestiga­dor sa Malabuyoc Police Station nga nahinabi sa Superbalita Cebu, nii­ngon nga ang 29 anyos nga negosyante nga taga Brgy. Montañeza niabot sa simbahan, alas 5:45 sa buntag sa naasoy nga adlaw, uban sa iyang pangasaw-unom, kabanay ug mga higala.

Ang iyang motorsiko gi-park atubangan sa simbahan duol sa kahoy nga mahogany alas 6:00 sa buntag.

Human sa kasal, nidiretso ang bag-ong matiayon sa motorsiklo apan nakugang sila dihang pag-abli sa u-box sa motorsiklo, wala na didto ang ilang kuwarta nga gibilin.

Nipadayon sila sa giamdam nga salosalo apan wala magdugay, niadto sa buhatan sa kapulisan aron pag-blotter.

“Wala na sila maka photo opportunity sa kalihukan. Na­guol ang bag-ong kinasal..” dugang ni Duerme.

Matod ni Duerme, wala pa silay matumbok nga res­pon­sabli sa pagpanglungkab sa motorsiklo.

Apan wala sab isalikway sa kapulisan ang posiblidad nga kaila sa biktima ang kawatan sanglit nakahibalo nga dunay dakong kwarta nga gibilin sa motorsiklo. Gipugos sa kawatan pag­langkat ang lingkuranan sa motorsiklo.

Ang kapulisan nakakuhag kop­ya sa CCTV camera apan la­yo kaayo sa nahimontangan sa motorsiklo hinungdan nga wa­la silay nakitang tawo. / GPL

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph