Bag-ong nakagawas sa Cebu City Jail (CCJ) ang nadakpan pagbalik sa buy-bust sa mga sakop sa Regional Police Drug Enforcement Unit (RPDEU) 7, alas 9:40 sa gabii, Huwebes, Septiyembre 26, 2024, sa Sitio San Vicente, dalan C. Padilla, Barangay Duljo Fatima, dakbayan sa Sugbo.
Ang suspek giila nga si Siarot Dayondon, 31, residente sa Sitio Mansanitas, Barangay Duljo Fatima.
Nakuha sa mga operatiba ang mga putos sa gituohang shabu nga motimbang sa 130 gramos nga dunay standard drug price nga P884,000.
Lima ka tuig nga nabilango sa CCJ si Dayondon sa kaso gihapon sa ilegal nga drugas ug niadto lang Agusto nakagawas sa bilanggoan.
Sa sulod sa bilanggoan, sumala sa kapulisan, iyang naamigo si alyas ‘Junpee’ nga maoy nag-agni niya nga inig gawas sa bilanggoan, mo-supply sa ilegal nga drugas.
Hatagan siya og suhol sa pagbodega sa supply sa gidiling drugas ug gawas niini, hatagan siya og drugas nga siya maoy mobaligya.
Ang iyang area nga baligyaan mao ang tibuok dakbayan sa Sugbo diin makabaligya kini og 150 gramos matag semana, nasuta sa imbestigason sa kapulisan. / AYB