Giila sa kapulisan nga bag-ong sulbong sa pagpamaligya sa ilegal nga drugas ang nasikop sa Labangon Police Station sa Cebu City Police Office (CCPO) atol sa buy-bust sa dalan A. Lopez, Barangay Labangon, dakbayan sa Sugbo, alas 2:10 sa kaadlawon, Martes, Agusto 13, 2024.
Ang suspek giila nga si Dennis Gorial Buenaventura alyas Dencio, 29, taga sa Sityo Mahayahay 1, Barangay Calamba, dakbayan sa Sugbo.
Nasakmit sa kapulisan ang mga pinakete sa gituohang shabu nga motimbang sa 10.25 gramos nga dunay standard drug price nga P69,700.
Matod ni Police Major Eraño Regidor, hepe sa Labangon Police Station nga nakadawat silag report gikan sa maong lugar nga kusog kaayo ang pinalitay sa ilegal nga drugas.
Mao kini hinungdan gipaubos dayon sa monitoring ug human makuha ang tanang impormasyon, gilusad ang buy-bust nga gipangulohan ni Police Lieutenant Raymart Rabanes ubos sa supervision ni Police Major Eraño Regidor.
Matod ni Regidor nga bag-ong sulbong sa lugar ang suspek diin ang iyang kustomer mao ang mga drayber sa e-bike drivers ug mga sikad-sikad sa dan A. Lopez, usa sa mga dapit sa dakbayan nga daghang nalambigit sa negosyo sa ilegal nga drugas .
Kasong pagpayuhot sa illegal nga drugas ang ipasaka sa Labangon Police Station batok sa maong suspek. / AYB