GIILA nga bagsik sa Lungsod sa Argao ang gipusil-patay sa gawas sa iyang giabangan nga balay alas 10 sa gabii sa Huwebes, Pebrero 27, 2025, sa Sitio All Season 2, Barangay Cogon Pardo, Dakbayan sa Sugbo.
Ang biktima nga namatay dihadiha giila nga si Joel Comaling, 36, taga Jampang, bukirang barangay sa Argao.
Sa imbestigasyon sa Inayawan Police Station, nasayran nga padulong na matulog ang biktima uban sa iyang kaipon nga si alyas Jenny dihang milagubo ang atop sa ilang balay kay gibato na diay kini.
Masuk-anon nga nigawas ang biktima apan giingong kalit lang siya nga gipusil sa wala mailhing suspek tumong sa dughan.
Gibutyag ni alyas Jenny nga sa wala pa ang pagpamusil, nigawas ang iyang kaipon aron mopalit og kape nga huloghulog duol sa ilang panimalay.
Naagian niini ang tapok sa mga batan-on sa gawas ug matod pa giingnan kon “kinsay bagsik diri” dayong lakaw.
Apan matod ni Jenny nga nagkomedya ra ang biktima tungod kay ang uban sa mga nagtapok kaila ra usab niya.
Si Police Lieutenant Colonel Maria Theresa Macatangay, deputy city director for operation sa Cebu City Police Office, niingon nga duna na silay giila nga person of interest (POI). Ang maong POI giingong nalambigit sa ilegal nga drugas.
Basi sa nakuha nga kasayuran, ang biktima giila nga drug personality nga nakigpinusilay sa mga polis sa Lungsod sa Argao.
Si Police Major Janus Giangan, ang hepe sa Argao Police Station, nitug-an sa interview sa Superbalita Cebu nga si Comaling maoy nag-ambush kanila atol sa ilang pag-serve og warrant of arrest sa iyang igsuon nga si Jonathan sa Barangay Jampang niadtong Agusto 20, 2024.
Atol sa binayloay sa bala, naigo ang maong biktima apan nakasibat samtang ang iyang mga kauban nadala sa tambalanan.
"Kanang tawhana ang dula ana drugs ug armas diri sa Argao, amo na gipasakaan og kaso 'nya padulong na mogawas ang warrant ana niya kay naulahi man namo pag-file ang kaso," matod ni Giangan. /AYB