Posibleng mosulod sa Philippine Area of Responsibility (PAR) sa weekend ang Tropical Depression Hagupit (International name) ug pagatawgon kini og “Caloy” sa higayon nga makasulod na, matod sa state weather bureau niadtong Huwebes, Mayo 7, 2026.
Sa advisory sa Philippine Atmospheric, Geophysical and Astronomical Services Administration (Pagasa), giingon nga ang sentro sa Hagupit namatikdan sa gilay-on nga 1,995 kilometro sa sidlakang bahin sa Northeastern Mindanao alas 4 sa kaadlawon.
Ang Hagupit naglihok paingon sa kasadpan sa kusog nga 20 kilometro matag oras (kph), uban sa maximum sustained winds nga 65 kph duol sa sentro ug paghuros nga moabot hangtod 80 kph.
“Padayon nga molihok paingon sa kasadpan ang Hagupit sulod sa sunod unom ka oras ug dayon mokurba paingon sa west-northwest sa nahibiling forecast period. Posible kini mosulod sa PAR tali sa Sabado sa gabii ug Dominggo sa buntag,” matod sa Pagasa.
Matod sa Pagasa, posible nga mokusog ang Hagupit ngadto sa high-end tropical storm sulod sa sunod 48 ka oras, apan posible sab kini mohuyang ug mahimong tropical depression pag-abot sa Martes samtang anaa sa Philippine Sea.
Giingon sa weather bureau nga dili pa direktang makaapekto ang Hagupit sa panahon ug kahimtang sa dagat sa nasod sulod sa sunod tulo ka adlaw.
Samtang giingon sa Pagasa nga adunay low pressure area (LPA) nga namatikdan sa gilay-on nga 120 kilometro sa habagatan-sidlakang bahin sa Hinatuan, Surigao del Sur alas 3 sa kaadlawon. Dili kini mahimong tropical depression.
Apan, gilauman nga magdala ang LPA og madag-umon nga kalangitan uban sa nagkatag nga pag-ulan ug thunderstorms sa Central Visayas, Eastern Visayas, Negros Island Region, Caraga, Northern Mindanao, Davao Region, ug Zamboanga Peninsula.
Ang Metro Manila ug ubang bahin sa nasod makasinati sab og partly cloudy ngadto sa cloudy skies uban sa isolated rain showers o thunderstorms tungod sa easterlies.
Nagpasidaan ang Pagasa sa posibleng flash floods ug landslides tungod sa kasarangan usahay kusog nga pag-ulan nga dala sa LPA, ingon man grabeng thunderstorms sa easterlies. / PNA
