Dul-an sa 7,000 ka indibidwal ang namakwit tungod sa kombinasyon sa epekto sa Bagyong Maymay ug sa Habagat (Southwest Monsoon), sumala sa Office of Civil Defense (OCD) niadtong Huwebes, Agusto 6, 2026.
Pagka alas 6 sa buntag, gibutyag sa OCD nga 80,633 ka indibidwal o 23,946 ka pamilya ang naapektuhan sa dautang panahon.
Gikan niini nga gidaghanon, 6,929 ka indibidwal o 2,215 ka pamilya ang nagpabilin sa mga evacuation center.
Matod sa OCD, nahatagan na og P1.38 milyon nga hinabang ang mga apektadong pamilya.
Natala sab sa ahensiya ang 12 ka mga balay nga nadaot ug 83 ka mga lugar nga gibaha sa Ilocos Region, Central Luzon, Zamboanga Peninsula, ug Bangsamoro Autonomous Region in Muslim Mindanao.
Nag-report sab ang mga lokal nga awtoridad og mga landslide ug pagkahugno sa mga bato (rockfall) tungod sa kusog nga ulan sa Cordillera region, ilabi na sa Probinsiya sa Benguet.
Sa Rodriguez, Rizal, duha ka tawo ang gikatahong namatay sa rockslide duol sa Wawa Dam.
Sa Barangay Shilan, La Trinidad, Benguet, duha ka tawo ang kompirmadong namatay human natabunan sa landslide.
Sa usa ka pakighinabi sa mga tigbalita, si Benguet Police Provincial Office director Colonel Dionisio Bonoy nag-ingon nga tulo ka indibidwal ang natanggong sa dihang nahitabo ang landslide mga alas 8 sa buntag niadtong Huwebes, Agusto 6, 2026.
Usa lamang ka indibidwal, nga nag-edad og 66, ang naluwas sa maong insidente.
“The area buried by the landslide was a bulaluhan. The people who remained inside were the cooks. They were the ones trapped. They probably didn’t have enough time to escape,” matod ni Bonoy.
Ang mga namatay nga cook nagpangedaron og 55 ug 31 anyos.
Gidugang ni Bonoy nga ang mga lumulupyo nga nagpuyo duol sa nahitabuan
gipasidad-an nga mobiya una sa ilang panimalay tungod sa sige’g ulan nga nakapahumok sa yuta.
Matod niya, upat na ka adlaw nga sigeng nag-ulan sa maong lugar nga maoy nakapahumok ug nakapahimong delikado sa yuta.
Apan, nagkanayon ang OCD nga wala pa sila’y opisyal nga kompletong datos sa gidaghanon sa mga nakalas o naangol sa maong bagyo.
Sa Nueva Ecija, pipila ka agianan sa karsada ang naapektuhan sa baha ug landslide apan dali ra sab nga nalimpyuhan ug naablihan sa Department of Public Works and Highways (DPWH).
Matod sa Pagasa nga sa alas-11 sa buntag niadtong Huwebes, ang Bagyong Maymay nihinay na ngadto sa usa ka tropical depression human kini motugpa o mag-landfall sa Magsingal, Ilocos Sur. / TPM /SunStar Philippines