Mga duwa karon:
12:30 pm- USC batok CITU (High School)
2:00 pm- BC batok CRMC (High School)
3:30 pm- UV batok UC (High School)
5:00 pm- UV batok CITU (College)
Labnihon og suway sa college defending champions University of the Visayas (UV) Green Lancers ang ikatulo nilang sunodsunod nga kadaugan sa samang gidaghanon nga mga duwa sa ilang pagpakigsangka sa Cebu Institute of Technology University (CITU) Wildcats sa main game karong Sabado, Oktubre 19, 2024, sa Cebu Schools Athletic Foundation Inc. (CESAFI) basketball event sa Cebu Coliseum.
Kon modaog ang Green Lancers, hayan makakuha sila og bahin sa lidreato kauban ang University of Cebu (UC) Webmasters ug Benedicto College (BC) Cheetahs.
Sa nag-una nilang duha ka mga duwa, ang Green Lancers ningpukan sa University of San Jose Recoletos (USJR) Jaguars, 78-71, ug University of San Carlos (USC) Warriors, 77-69.
Sa ilang bahin, ang Wildcats adunay 1-2 nga rekord.
Sa high school division, magsangka ang CITU Wildkittens batok USC Baby Warriors sa premirong duwa, mag-abot sa ikaduha ang BC Baby Cheetahs batok Cebu Memorial Colleges (CRMC) Baby Mustangs unya mosunod ang panagharong sa UV Baby Green Lancers batok UC Baby Webmasters.
Sa mga duwa niadtong Huwebes, Oktubre 17, gipangmakmak sa USJ-R Jaguars ang University of Southern Philippines Foundation (USPF) Panthers, 75-52, sa college division samtang gipatapsingan sa UV Baby Green Lancers ang University of Cebu Lapu-Lapu Mandaue (UCLM), 65-64, sa high school division. / ESL