Pwerteng kurata ug guola sa usa ka mag-uuma dihang iyang nakaplagan sa Miyerkules sa buntag, Marso 13, nga natabas ang pamatong o usa ka bahin sa buko-buko sa iyang binuhi nga toro nga baka.
Ang tag-iya giila sa iyang mga pag-umangkon nga si Sergio Ricaborda, 59, ulitawo, taga Sityo Cansin-o, Brgy. Lindogon, lungsod sa Sibonga, habagatang Sugbo. Si Ricaborda usa ka mangulingay, tipik sa iyang kita iyang gigasto sa baka nga iya kaayo nga pinangga. Si Ann Datuin, usa sa mga pag-umangkon, nipadayag sa iyang kasagmuyo sa iyang post sa Facebook.
“Naa dyuy mga tawong salbahis, walay batasan. Hasta baka sa akong uyoan (yoyo seryo) gitigbas pa jud. Naningkamot intawon og panguling ug tinagad niya iyang baka pero tigbason ra sa tawong salbahis,” si Datuin sa iyang post.
Ang laing pag-umangkon nga si Khienard Jhones Albas, sa interbyo sa Superbalita Cebu, niingon nga grabe ang kaguol sa ilang uyoan, wa kini nikaon busa ilang gialam-alaman.
Matod pa ni Albas nga ang iyang uyoan nibalhin og gitugwayan sa iyang baka sa may Brgy. Sumaguan, Argao, duol sa balay sa iyang ig-agaw nga ubos ra sa ilaha sa Cansin-o, Lindogon, Sibonga kay wa nay masibsib nga mga sagbot gumikan kay nangalaya na sa kainit sa panahon.
Alas 10 sa Miyerkules sa buntag, sa dihang lawugan na unta ni Ricaborda ang iyang baka, didto na madiskobrehi niya nga may dakong samad na ang iyang binuhi.
Sa pagsuwat ning taho wa pa mailhi ang nitigbas apan gipa-blotter na kini sa barangay hall sa Sumaguan. / DVG