Bakery gibato, gipusil

Gipusil sa wa pa mailhing mga lalaki ang usa ka ba­ke­ry sa dalan Tabura, Brgy. Pardo, dakbayan sa Sugbo, Miyerkules sa kaadlawon No­biyembre 22, 2023.

Sa kuha sa CCTV camera, padung na nga manira ang anak sa tag-iya sa tindahan apan kalit lang nga ning-abot ang duha ka mga tawo nga nagsakay sa usa ka motorsiklo ug namusil kaduha ka higa­yon tumong sa bakery.

Hinuon, way naigong tawo apan nakamugna og kahadlok sa tag-iya sa tindahan nga dili una magpahingalan.

Matod ni Police Lt. Colonel Janette Rafter Rafter, deputy city director for operations sa Cebu City Police Office (CCPO), naghimo na’g imbestigasyon ang Inayawan Police Station sa maong insidente.

Wa magpa-blotter sa kapulisan ang tag-iya sa bakery, apan nanawag ug nipahibalo sa hitabo.

Sa Martes sa gabii, Nobiyembre 21, ang maong tindahan gibato usab sa wala mailhing tawo.

Gipangsubay na sa Inay­a­wan Police Station ang mga CCTV camera sa kasikbit nga establisemento kon duna ba kini nakuha nga footage sa hitabo.

Ang tag-iya sa bakery nga dili lang magpahingan, sa interview sa GMA 7 Regional TV Balitang Bisdak, nagkanayon nga na-trauma sila sa maong hitabo.

Gibutyag niini nga makaduha na ka mga higayon nga gipusil sila apan ang una wala mobuto ang armas. Kini nahitabo niadtong Lunes sa gabii, Nobiyembre 20, 2023.

“Nakuyawan gyud kaayo mi uy, na trauma gyud mi...” matod sa tag-iya.

Mibalik kini pagka Martes sa alas 3:00 sa kaadlawon diin gilabay sila og bato apan maayo na lang nga walay naigo.

Base sa ilang nakita sa vi­deo, matod ni Rafter, walay intensyon nga mopatay ang mao nga mga tawo.