Gitulis sa upat ka mga batan-ong lalaki ang bakery sa Barangay Mangoto, lungsod sa Pinamungajan, alas 4:00 sa kaadlawon sa Sabado, Nobiyembre 11, 2023.
Sa pakighinabi sa Superbalita Cebu sa officer in charge (OIC) sa Pinamungajan Police Station nga si Police Capt. Michael Sevilla, nasayran nga ang gitulis mao ang Famiilas Bakery.
Sumala sa tindera ug cashier nga si Fatima Ejera, 28, minyo, taga Brgy. Bonbon, lungsod sa Aloguinsan, upat ka wala mailhing mga batan-ong lalaki nga gibana-bana nga nagpangidaron og 17 ngadto sa 20 anyos, nagpakaaron-ingnon nga gipang-uhaw ug nangayo’g tubig.
Apan, asoy sa tindera ngadto sa kapulisan, gipasulod siya ug gitionan og screw driver ug nideklarar og tulis.
Matod sa tindera, sa iyang kahadlok, gihatag niya ang P20,000 nga halin ug ang iyang cellphone nga balor og P5,000.
Ang upat ka mga tulisan daling ningsibat ug wa na maabti sa kapulisan sa Pinamungajan nga niresponde sa alarma. Padayon pa ang ilang pag-ila sa mga tulisan.