Balak: Ang hara ug ang tuwangtuwang

Desiree L. Balota

City of Talisay, Cebu

kay gipiangan sa kuno harihari,

gipalakang sa hara

ang nagtakiang nga tuwangtuwang

sa trono nga nakatulog

human niyarok og pito ka dag-om

ug nanug-ab og pito ka panganod.

ang setro nga nitungab og kilat

aron makabugwak og dugdog

gipakaratil og gawas sa gingharian.

gipaapas ang korona

human iyabo sa hara

ang nasawod nga pagbunok.

inanay unya niya kining ibubo isip pangatarongan

sa huwaw nga matagamtaman.

pagmata sa trono,

nahilot ang takiang sa tuwangtuwang.

niyukbo sa trono ang hara ug ang tuwangtuwang.

human nituyhad ang hara,

nipakita ang setro ug korona

ug uban nila, ang tuwangtuwang ug ang hara,

nitalikod. nanagan.