Balak: Ang kagirong iro ug ako

Balak: Lagkaw

OLIVER P. FLORES
Sogod, Cebu

Gilabay kog bato ang kagiron

ug niwang nga iro. Naglagot ko.

Malipay diay ko nga gisungkab

man ani ang

ginamos

nga gipatong

sa ibabaw sa bulingon

ug nagtakilid

nga lamesa sa kabungkagon nakong

barungbarong?

Gitilapan ko ang

namilit nga sabaw

sa ginamos sa tayaon

nga plato.

Hupyak ang akong tiyan nga mikanaog

sa barungbarong.

Gisalig-ay ko ang

dunot nga sako.

Giantos ko ang kainit

sa kabuntagon kay kabahin kini

sa akong pagpakabuhi. Nahanggap ko

ang kabaho sa

kalibutan

sa mga timawa.

Nanguykoy ko ug ang kapuslan pa

akong gisulod

sa sako.

Ang kagirong iro

misapigad nako.

Gilabay ko

dayon og bato.

Naigo ang ulo ug

nagtabisay ang dugo.

Apan wa mobiya kanako ang iro.

Sa akong pagpaingon sa ‘junk shop’

Nagsunod kini nako. Hangtod sa akong

Pagpauli mikuyog

nako ang iro.

Wa ko na siya bugawa ug labayag bato!

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph