JOJIE E. OGA-OB
Barili, Cebu
Nakit-an ko kining
hubo nga nagpaso-paso
sa kadalanan bitbit
ang usa ka di matinong
butang nga bulingit, nagkamuritsing.
Dihang akong
nasigpatan
iyang dala,
nakaamgo kong kini
mao ang
dugay nang
gipangita sa
kadaghanan.
Ang butang nga
maoy ilang gibugtaw sa ilang tagsa-tagsa
ka paningkamot, lakaw sa kinabuhi.
Apan nahibulong
kong taliwa sa kabililhon
niini, bisag dayag
nang gipakita
sa mga mata,
walay usang mikibo, mihatag og pagtagad.
Basin kaha tungod sa
gum-os niining hitsura,
daw samin nga
kon ilang
masud-ong
makita nila
ang repleksiyon sa hugawng sila.
Busa mas gipili
nilang lingiw-lingiwan na lang kini,
gipili nga
magpakabuta sa pagpangita niini.