Balak: Ang magsusulat usa ka tigre

JOJIE E. OGA-OB

Barili, Cebu

Ang magsusulat usa ka tigre

nga mag-inusarang mangayam

og tukbonon nga ideya sa dakong

lasang sa hunahuna.

Kinsa andam mosum-ok sa kalibunan,

maghapa-hapa, magpahipi,

magkinto-kinto, mag-amping nga

di makatugaw dayong

mat-an pa

sa pinya nga mosugab sa higayong

naay moaksiyog guho nga ideya.

Dunay mga higayong sama lang

kagamay sa ilaga ang makaon,

ug ingon lang kasayong patyon,

usapon, dugmokon. Apan naa say

higayong sama

kamangtas sa bitin

nga kinahanglan pang layugon,

bugnuon taman sa ginhawa

sa tinguhang makuha.

Kay sa kataposan,

duha ray ilang

kapaingnan: ang magsusulat

mamatay alang sa ideya o ang ideya

ang mamatay alang kaniya.