Balak: Bag-ong tuig: 2024

Balak: Bag-ong tuig: 2024

Gihinginlan na sa panahon si 2023
Mibiya siya nga nagbilin ug mga lama
Diha sa panumdoman sa matag tawo
Nagkadaiyang mga lama: May mga pat-ak
Sa kalipay ug kahimungaya ug may mga luta
Sa kasakit nga daw walay balsamo nga
Ikahingilin sa kahapdos nga mikuyamang
Sa kinahiladman niadtong mga linalang
Nga nahiagom sa mga nagkadaiyang trahedya
Sa kinaiyahan: Bagyo, linog apil na ang dili
Kapugngang sunog ug lain pang mga alantuson
Nga mugna niadtong mga lampingasan
Ug way kasingkasing natong isigka-ingon.

2024... niining imong pag-abot hangpon ko ikaw
Ug ipauraray sa akong dughan uban ang lain usab
Nga panghinaot nga wala nay moabot pang mga
Katalagman nga mugna sa kinaiyahan ug kadtong
Mga sagbot sa katilingban malamdagan na ang
Ilang alimpatakan aron dili na mosanay ang mga
Dangan sa ilang katampalasan.
Dayon, O, dayon, 2024! Kay mitalikod na si 2023!
Ug gasahi kamig daghang kabulahanan!

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph