CARMELO D. LARIOSA
Panadtaran, San Fernando, Cebu
Way sukod ang buylo sa hunahuna
Nga nanukad aron makalupad
Ug sa iyang paglupad wala nay nahabilin
Pang mga anino kundili mga bulak
Na lang nga gikuptan sa kahilom
Kay di na buot molingi ang nawong
Sa kilumkilom nga naghukdong
Daw patayng-buhi nga bato kay
Dili na makaikyas ang pagbasol.
Ang tanan diha na lang mangatun-as
Sa pangpang nga naghuwat sa dagat
Sa iyang pagtaob, ug ang bulak
Nga iyaha sa handurawan natuloan
Na hinuon sa luha sa nagbangutan
Nga kilumkilom!