Balak: Disyembre

Balak: Disyembre

OLIVER P. FLORES
Sogod, Cebu

Gihandom ko ang kainit sa mga bukton

sa mitalikod nga gugma aron motaliwan

ang umog nga gidagpi mo sa uhaw

kong lawas nga nangandoy sa dinagaang

sa di na madungog nga mga kagiki.

Dugay nang panahon nga gipang-it

sa mala’a mong katugnaw ang nangamuyo

kong kasingkasing. Pagkalayo sa pikas baybayon

nga kon sukdon sa mga tudlo usa lamang

ka dangaw. Ang imong anino usa ka bantaaw

sa nalugti nga kagahapon. Ang gisabwag

mong alimyon nga kaniadto nahanggap ko--

karon ang kalang-og ang nanuhut-suhot

sa nangagho kong kalag!

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph