Balak: Duhawit sa dagat ug kagabhion

Balak: Duhawit sa dagat ug kagabhion

CARMELO D. LARIOSA

Panadtaran, San Fernando, Cebu

Nadungog na sab nako ang kanhi

Tang duhawit nga daw kaluha sa

Saloma sa dagat ug sa kamingaw sa

Kagabhion. Imo akong giawitan

Unya sa kalit nahanaw ka.

Sa atbang sa akong bentana napilay

Ang karaang kahoy nga Balite sa kakusog

Sa higanteng Bagyo apan kini wala maluad,

Wa mabali.

Ang among mga silingan ming-asoy

Nga nakabati silag danguyngoy sa agta

Nga nagpuyo sa karaang Balite atbang

Sa akong bentana. Apan lahi ang akong nabati

Kundili ngiyaw man sa higanteng iring

Nga maoy tigtukob sa relihiyusong mga

Tiki nga manaog sa pasamano sa binuksan

Kong bentana. Kining Iringa maghupo-hupo

Maniid nga saksi sa maghinagkanay

Nga kahayag ug kangitngit.

Karong gabhiona tawgon ko ang matahom

Kong Musa nga nagpuyo didto sa gingharian

Sa dagat aron iya kong kuyogan sa akong

Pagkatulog gikan sa bag-ong gabii hangtod

Sa kinatumyan sa akong daman!

Related Stories

No stories found.
SunStar Publishing Inc.
www.sunstar.com.ph