Balak: Hinapos nga panagtagbo

LEONEL QUILLO
San Fernando, Cebu

Adunay salampating nagtangag
Og kahangturan nga nagbatog
Sa usa ka sanga nga sumala pas dibuho
Sa usa ka salamangkerong bunguton,
Kahoy nga may gisablay nga nalanay
Nga orasan nga ang buot ipasabot
Niini sa lawanit nga paghubad,
Nga mamahimong mahitabo ang
Wala pa mahitabo diin ang wala pa
Mahitabo mahimong mahinumdoman
Isip usa ka panumdoman --

Sama pananglit niadtong usa ka
Panagtagbo diin imo kong gihatagan
Og habol nga matod mo pa tigsanta
Sa kabugnaw sa akong lapalapa.

Gihatagan ko usab ikaw og regalo,
Usa ka puting rosas ug dunot
Nga retrato natong duha diin ang imong
Gisul-ob mao ang bestida nga binurdahan
Og gumamela ug ang a
kong gisul-ob
Mao ang akong uniporme
sa pagkasundalo
Diin ang tuo kong kamot naggunit sa armas
Nga may bayoneta.

Sa higayon nga wala pa mahitabo
O sa panghitabo nga
hagbay ra nga
Gikalimtan sa tago,
tipigi ang atong hulagway
Sama sa akong pagtipig
niini,

Ug tali kanatong duha
Kalimti ako sa dayon.