Tea Solon
Mabolo, Cebu City
giliso pag-usab ang gripo sa
panahon. nibuhagay ang agas
sa nagkadaiyang mga bulok—
amarilyo, kahel, rosas, puwa—
maanyag nga dahon sa otonyo.
mantikaon na usab ang antik
nga makinilya ni tatay andres.
mapamati na ang iyahay nga
halok sa tudlo ug tikla dayong
tukar sa mga pulong sa dughan.
sutoy napud ni andar sa dangog
nga papel de karsada ang bolpen
sa iyahang magmumugnang binhi
hain ang mga pulong naglumbag
ilog pahimutang og parada.