alalayan ba kaha ko nimo,
akong pinangga?
unta basahan ko nimo
sa mga balak ug nobela
kon mapundir na kining
akong mga mata...
kon inanayng bawion na
ang akong pandungog
ug ang siyok mopadulong
sa kahilom, dili kaha ka
mawagtangan og gana
makig-istorya kanako?
akong pinangga,
padayon mo pa kaha
akong panggaon
sama adtong
linghod pa kita?
kon ugaling papason na
sa nanglaylay nga panahon
ang akong panumdoman,
panigurohon ko,
akong pinangga,
nga dili mapanas
ang paglitok ko
sa imong ngalan