Ni Ernesto A. Amatiaga
Bisan giunsa kog hulip
sa tugbaw nga pagmaya
ang luta sa mga kahidlaw
nga gikuhman sa mga kasakit
dinagaang sa kainit sa imong
mga parayeg, nagabilin
og buhing alinsangaw nga natuob
sa mga paghandum
Ug matag duaw sa katulogon
mobiaw kining mga luha
unya hakpon sa kasibot
kining uhaw kong balatian
pagpanudya sa panahon
Hangtod ang mga kamot
sa igihan kong gialamhan
nagpangawhat nga unta
ang anino sa handurawan
matago sa libon sa kalimot!