Ronan Lingatong
Maslug, Baybay City, Leyte
Duha ray kapaingnan
Ning atong panaglalis
Una.
Dili ka moatubang
Ug makig-estorya kanako ugma
Ikaduha.
Magtalikod ka inig katog nimo
Dili nimo ihabol ang kangitngit
Ug pasagdan nimo
hangtod
Akong makita ang banagbanag
Sa imong hanayhay—gikan
Sa imong lapalapa
sangko
Sa imong tangkugo
Kay akong sala
Ako lagi tong sala
Akong dakong sala
Hinaot mapasaylo ko nimo
Karong gabhiona
