ARIANNE JOYCE B. ROMAGUERA
El Pardo, Boljoon, Cebu
Kon gabii na ang kabuntagon,
kon wala nay gahom sa pagsilang ang adlaw,
kon natak-om na ang mga baba sa manok
nga sa kaadlawon unta motuktugaok.
kon nahanaw na kadtong humot nga alimyon
gikan sa kusina nga maoy pamukaw kanamo ni Mama.
kon hapon na ang kaudtuhon, kon wala nay panahon
nga itugway pa sa sibsiban ang kahayopan.
kon ang bugnawng yelo mamahimo nang bato
sa nagbagang kalayo. kon wala nay bisag usa ka lisong
moturok sa binhi nga gisabod ni Papa sa iyang baol,
kon mohalok na ang mga bulak ngadto sa nag-ugang yuta,
kon ang kabukiran mahimo nang lapad nga kapatagan,
kon molugsong na ang kabungtoran ngadto sa kadagatan,
kon ang mga katawa ug kasadya kon dunay pista
mahulipan na sa mga agulo ug danguyngoy,
kon wala nay kalipay nga mosulod sa kasingkasing
kay puro luha ug kasagmuyo na ang gihambin...
Kining tanan timaan na nga katapusan na sa kalibutan.