Dili masaksihan ug masinate sa mga Sugbuanon ang kangitngit atol sa adlawan tungod kay ang total solar eclipse dili makita sa nasod, ilabi na sa Sugbo.

Ang weather specialist nga si Jhomer Eclarino sa Regional Services Division sa Philippine Atmospheric, Geophysical, and Astronomical Services Administration (Pagasa) Visayas niingon nga makita ang ang total solar eclipse sa laing bahin sa kalibutan.

Samtang, gisalikway usab ni Eclarino ang mga pangangkon sa social media nga sulod sa tulo ka adlaw ang masinati'ng kangitngit.

Nasayran nga ang usa ka solar eclipse mahitabo sa dihang ang buwan moagi direkta sa taliwala sa kalibutan ug sa adlaw hinungdan nga maalihan sa buwan ang kahayag gikan sa adlaw ug mongitngit ang kalibutan nga mora og gabii.

Matod ni Eclarino sa SunStar Cebu niadtong Sabado, Abril 6, 2024, nga ang total solar eclipse makita sa Marquesas Islands, nga usa ka grupo sa mga volcanic islands nga nahimutang sa French Polynesia.

Bisan pa, ang pipila ka mga nasod sa rehiyon sa Pasipiko ug North America makasaksi usab sa maong phenomenon.

Siya nidugang nga ang solar eclipse mobalhin sa North America sugod sa Pacific Coast ug mobalhin paingon sa Mexico, United States of America, ug Canada.

Matod ni Eclarino nga matapos kini sa Atlantic Ocean.

“Kadtong makasinati sa total solar eclipse, makasinati sila og temporaryong kangitngit tungod sa pag-align sa adlaw, bulan, ug yuta,” matod niya nga ang panghitabo mahitabo sulod sa pipila ka oras.

Dugang pa, si Eclarino miingon usab nga ang mga espekulasyon sa tulo ka adlaw nga kangitngit dili tinuod tungod kay kini kulang sa siyentipikong ebidensya.

Sa sayo pa, gipanghimakak usab ni Astronomer Nico Mendoza sa Pagasa central office ang maong pangangkon.

“Gusto [namong] ipahibalo sa kadaghanan nga ang mga balita nga naglibot sa internet bahin sa yuta nga nakasinati sa tulo ka adlaw nga kangitngit tungod sa pag-agi niini sa Photon Belts sa Abril 8, 2024, di tinuod,” ingon sa weather bureau.

Sa laing bahin, si Eclarino niingon nga usa ka planetarium sa Pagasa sa Mactan ang gilantaw nga mahuman karong tuiga.

Wala hinuon siya mohatag og laing mga detalye sama sa giplanohang petsa sa pagkompleto apan, sa pagkakaron, matod niya nga aduna pa’y mga trabaho nga kinahanglang buhaton sa maong establisemento.

Usa ka planetarium, o usa ka pasilidad nga gidesinyo sa pagsundog sa celestial nga palibot, nga nagtugot sa mga bisita sa pag-obserbar ug pagkat-on mahitungod sa mga bituon, mga planeta, ug uban pang celestial nga mga butang, sa dili madugay ablihan duol sa Mactan-Cebu International Airport sa Lapu-Lapu City. / KJF

Balak: Lux et tenebrae (Kahayag ug kangitngit)

Trending

Just in

Branded Content