Balak: Luyo sa akong pahiyom

Balak: Luyo sa akong pahiyom

EMELY BENTAZAL FELIPE
El Pardo, Boljoon, Cebu

Akong mahanduraw ang mga kasakit
Sa higayon sa akong pag-inusara
Magbalik-balik sa akong panumduman
Ang mga panghitabo nga wala nako
Damha ug sa kalit akong nabatyagan.
Inay nga motulo ang akong mga luha
Daghang pangutana motumaw
Sa akong hunahuna.
Giunsa nako pag-atubang?
Giunsa nako pagsulbad?
Giunsa nako pagdawat?
Giunsa nako pagdala?
Bisan sa tanan nga mga kalisdanan
Bug-os akong pagtuo ug pagsalig
Nga ako kining makaya sa hinayhinay.
Apan dili nako ikalilong sa uban
Ang kapakyasan ug mga kagul-anan
Kay nakagamot na kini sa akong balatian.
Daghang moingon nga ako malipayon
kay sa kanunay ako mapahiyumon.
Dili nako kana isalikway ug ilimod
Apan wala sila masayod nga ako
Nagtakuban lamang nga malipayon.
Bugtong ang Labaw nga Makagagahom
Ang nasayod sa tanan sa akong estorya
Luyo sa akong pahiyom.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph