GERWIN VIC E. BHUYO
Bangkok, Thailand
Sa among pangumustahay sige ra kag paniid
sa among paambitay
sige ra kag
paminaw
sa among tinubagay
sige ra kag pangukoy
sa among hisgotay
sige ra kag
panglili
sa among bahakhakay
sige ra kag patuyhakaw
hinumdumi baya wala ka namo giisip nga
estranghero, gani kanunay ming gahuwat
galaom makadungog pagbalik sa
imong tingog
sa imong kinagiki
kahimos mong pagasud-ungon
maghangop ta og balik sama kaniadto
kon unsa man gani imong gipas-ang krus
sa kinabuhi ibutang usa ayaw paturatoy
sultii mi ayaw kahadlok
dili namo kabaro
si Poncio Pilato.
kon mahimo sa imong pagpaambit ayaw saguli
og pantasya buhing kamatuoran sa imong suliran
sa laktod nga pagka-estorya ayaw pamakak
kon dili ka gustong mapahak
sayod gyod ka sa gipanumpa ta
walay luna
higala nga bakakon
ayaw paabota nga ikaw mangumusta
mopaambit mohisgot
manghilam-os unya ka sa among tubag
ug bahakhak — Nakit-an.