Balak: Ngutngot

Balak: Ngutngot

CARL MANTUA

Ormoc City, Leyte

Matag gutgot ni Noy Sayong sa iyang

biyolin nga hinimo’s guod sa kawayan

moawas ang mananoyng tingog niini

manumbay huning sarang motugaw

sa kagabhion diin mahalingi ang mga

insekto sa siot ug mohunong kadiyot

sa ilang nukturnal nga orkestra...

Karon sulagma na

lang ni Noy Sayong

gutgoton ang pulso sa iyang tulunggon

kay dungan niini,

dugo na sa panamilit

ang mosagol sa

huyuhoy sa

hangin nga

motadlas sa kadulom lagbas sa

langit

nga karon gilayasan na sa mga bituon,

ug ang mga angheles sa kalangitan

nanagsubo tungod

sa usa ka alampat-

nong obra nga giyam-iran sa matuod

nga bili niini.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph