Balak: Pagsulat

Balak: Lagkaw

LEONEL QUILLO
San Fernando, Cebu

Ang pagsulat mopikpik
sa atong abaga ilawom
sa kangitngit.
Ang pagsulat maoy mogunit
kanato aron kita dili gayod
masukamod sa lim-aw
sa atong kaguol.
Kay ang pagpakabuhi isip
usa ka tawo igo nang
hinungdan nganong kita
masulub-on ug nagpadayong
nagmasulub-on.

Kay wa tay pagpakabana
sa atong isigkatawo.
Way gustong mobasa og nobela,
way gustong mosulat og sugilanon,
way gustong maminaw,
Way gusto og kalinaw.
Gusto sa tanan ang giyera.
Ug ang pagsulat mao na lamang
ang bugtong nagtindog human
sa pagkatumpag sa atong kaugalingon
ug sa nagpadayong giyera sulod
sa atong mga kasingkasing.
Ug bisan og puniton ta kining
atong kaugalingon ug suwayag taod
ang atong piyesa magabii samtang
adunay serbesa, kita ra gihapon maoy
mobungkag sa atong kaugalingon.

Ug ang bugtong tang manluluwas
gikan sa kapintas sa tawo mao ang
pagsulat kay ang pagsulat usahay
mao na lang ang bugtong hinungdan
sa atong pagpakabuhi.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph