Balak: Pukaw

Balak: Pukaw

CARL MANTUA
Ormoc City, Leyte

Matag usa dunay
nausik samtang gabaktas
paingon sa kasadpan:
may pipila kanila
adunay wala matuman,
kadtong mga saad nga nangasaag lang
paghiabot sa may nagsangang
dalan.
ang uban may nalingian
ug nalabyan,

ug sa paghiabot sa likoon sa unahan,
mihapit ang kahiamgo, nga diay
kinahanglan sab kadtong hunongan
sa makadiyot ug puy-an,

apan duna pay lain kay samtang
nanudlay ko: may pipila
ka lusok
nga nangatagak, nakigharong ko
sa samin.

gibawi na ang panahong mihawid niini.
mao nga akong
gipupho ang
mga lugas
sa diyutayng kahayag, samtang
anam-anam
nang mihabol ang nagmatang kagabhion.

Related Stories

No stories found.
SunStar Publishing Inc.
www.sunstar.com.ph