Karon gitan-aw nato iyang ugang mga ngabil mikibot
Sa ugang wanang nangita sa nektar nga gihipos
Sulod sa porselanang mga botelya.
Gitan-aw nato Siya nga nangandoy sa nektar
Nga gitagoan sa usa ka hari sa sekretong lugar
Alang da gayud sa iyang pagdimdim.
Gitan-aw nato atong kaugalingon nga nihatag Niya og aslom
Nga ilimnon, dili gani gikan sa parasan
Ni Bakkus.
Wala kita makakita sa mga yamog nga motulo sa mga rosas
Sa kagabhion; apan angay natong pangitaon ang nektar
Nga gihipos sa mga porselanang botelya.
Unsa man kini? Nangutana kita. Unsa ang katam-is Iyang
Gikahinamang dimdimon? Karon ato Siyang gilantaw
Nga nagpakasakit alang niini. Atong gitan-aw ang atong
Kaugalingon samtang nagtutukay nga way nasabtan.
Ah, kinahanglan ba diay nga ilansang Siya sa krus pag-usab
Aron sudlan og nektar gikan sa mga porselanang botelya
Ang atong way kaalam nga mga kasingkasing?