Duha ka managlahi nga mga sunog ang niigo sa usa ka balay ug landfill sa lungsod sa Sibonga, habagatan sa lalawigan sa Sugbo, Miyerkules sa gabii, Mayo 8, 2024.
Unang sunog nahitabo sa usa ka dumpsite sa alas 5:45 sa hapon sa bukirang barangay sa Magcagong ug hingpit na kini nga napawong pasado alas 12 sa tungang gabii sa Huwebes, Mayo 9, sumala ni Fire Officer 2 Niño Rey Nacilla.
Matod ni Nacilla nga wala na sila makaresponde sa laing sunog nga niigo sa usa ka balay nga gikataho’ng gipanag-iya sa magtiayong Marcenillo ug Leonilyn Jaluag pasado alas 7:43 sa gabii tungod kay nagtinabangay sila sa sunog sa landfill.
Ang mga bombero sa dakbayan sa Carcar ug lungsod sa Argao maoy nipalong sa kayo sa ikaduhang sunog alas 8:55 sa gabii.
Mokabat sa P100,000 ang danyos sa sunog sa balay ug gituohang electrical short circuit ang sinugdanan niini. / DVG