Nidahili ang yuta sa Sudlon Riverside sa Barangay Lahug, Dakbayan sa Sugbo niadtong gabii sa Hunyo 6, 2025 nga niresulta sa pagkahugno sa usa ka kuwarto sa balay nga nahimutang duol sa sapa.
Ang insidente na-report sa Lahug Fire ug daling girespondehan sa Cebu City Disaster Risk Reduction and Management Office (CCDRRMO), nga gipangulohan ni retired F/CSUPT Aderson Comar uban sa mga Quick Response Team (QRT) Operatives.
Ang mga responder nakatala og gamayng kadaot ug padayong gi-monitor sa CCDRRMO ug Lahug Fire aron masiguro ang kaluwasan sa mga residente.
Gitambagan ang mga pamilyang naapektuhan nga makig-coordinate dayon sa CCDRRMO o sa ilang barangay kung adunay kausaban sa sitwasyon.
Gipasidan-an sab sila sa CCDRRMO nga magpabiling magmabinantayon sa bisan unsang emerhensya.
Gidasig ang tanan sa mga otoridad nga mangandam ug magmonitor sa kahimtang sa panahon kay kini makatabang sa pagpanalipod sa komunidad.
Ania ang Cebu City Command Center Emergency Hotline alang sa mga emehensiya: 166 / 262-1424, 0932 537 7770, 0917 839 9896.