Usa ka balay sa Purok 23, Brgy. Poblacion, lungsod sa Sibonga, habagatang Sugbo nasunog alas 5:35 sa hapon sa Dominggo, Abril 21, 2024.
Ang balay gipanag-iya sa magtiayong Jacqueline Campos Generosa ug Eric Generosa. Naapil ang awto ug motorsiklo sa pagkasunog.
Matod pa usa ka concerned citizen ang nanawag sa kapulisan nga nagpahibalo bahin sa naasoy nga sunog.
Girespondihan dayon sa kabumberohan sa Sibonga ug sa mga polis nga ubos sa kamandoan sa ilang hepe nga si P/Capt. Fort Antony Valdez.
Nasuta nga gawas sa balay nga naugdaw, may awto nga Toyota Vios ug Rusi nga motorsiklo nga diha gi-park atubangan sa maong balay nga naapil sa pagka sunog, suma lani Valdez, apan partially damaged lang kini.
Nasuta nga wa diha ang magtiayon atol sa sunog sa ilang balay ug gidudahan nga electrical short circuit ang hinungdan.
Gibana-bana nga P13,00 ang danyos sa sunog sa balay nga ginama sa light materials, wa giapil ang duha ka mga sakyanan.
Sa laing bahin, nasunog ang dapit sa generator sets sa Chong Hua Hospital sa dalan C. Rodriguez, Brgy. Capitol Site, Siyudad sa Sugbo, alas 11:49 sa buntag, Lunes, Abril 22 , 2024
Base sa imbistigasyon ni F03 Fulbert Navarro, imbistigador sa Cebu City Fire Office nga ilang napalong ang kayo sulod sa pipila ka minutos ug ang danyos gibanabana nga P800,000.
Atol ning pagsuwat, gisubay pa kon unsay hinungdan sa pag-ulbo sa kayo. / DVG