Naugdaw sa hingpit ang usa ka panimalay human nasunog alas 3:45 sa kadlawon niadtong Dominggo, Agusto 17, 2025, sa Barangay San Cruz-Sto. Niño, Lungsod sa Balamban.
Ang panimalay gipanag-iya ni Crisanta Erasan Quicho, hingkod ang panuigon.
Si FO1 Almark Alasco, imbestigador sa Balamban BFP, kinsa nahinabi sa Sunstar Superbalita Cebu, niingon nga ang sunog giisa sa first alarm ug na-fire out alas 5:10 sa buntag.
Matod pa ni Alasco nga ang tag-iya tua sa kaulohan ug ang mga paryente lang ang nahabilin atol sa sunog.
Usa ka Rodora Verano nibutyag nga ang kayo nagsugod sa second floor.
Ginama sa kahoy ang second floor sa panimalay ug sementado ang silong niini.
Wala pa masubay sa kabomberohan kon unsay hinungdan sa sunog ug napadayon ang ilang imbestigayon. Wala hinuon naangol atol sa sunog.
Adunay kasigbit nga panimalay ang nakan-an og gamay sa kayo. Wala pa sab kompletong mga detalye ang bombero kon pila ang danyos sa sunog.
Niabag sa mga bombero sa Balamban ang ilang mga kaparang sa gikan sa mga kompanya sa Tsuenishi Heavy Industry ug West Cebu Estate. / GPL