Tungod kay matod pa gihunghongan sa demonyo, usa ka 35-anyos nga lalaki nga giingong nagumon sa ilegal nga drugas ang kalit nisunog sa balay sa iyang iyaan mga ala 1 pasado sa kaadlawon sa Biyernes, Hunyo 13, 2025, sa may Sitio Upper Green Valley Tophills, Barangay Lahug, Dakbayan sa Sugbo.
Nailhan ang suspek sa alyas nga Roger, walay trabaho, residente sa nahisgutang dapit.
Matod ni Joesil Monisit, ang tag-iya sa maong balay nga kalit lang giguba sa suspek ang screen nga gihimo nilang bungbong ug gibubu-an og thinner dayon giduslitan sa dala niining lighter hinungdan nga nisilaob kini.
Maayo na lang gani kay nabantayan ni Monisit ug nadali og pawong ang kayo.
Pagkahuman sa gibuhat sa suspek, giingong nidagan kini paingon sa ilaha apan dali nga nakatawag ang tag-iya og polis nga niresulta sa pagkasikop niini.
Ang uyoan sa suspek nga si alyas Arnold, niingon nga nasobrahan sa bisyo si Roger maong bisag unsa na lang ang madunggan ug makit-an niini.
Nidugang sab si Arnold nga gibiyaan na sa pamilya ang suspek tungod sa batasan niini nga kalit lang maghasi ug mangulata.
Samtang sa habig sa suspek, niangkon siya nga iyang nabuhat ang maong salaod tungod kay naay magsige og hunghong kaniya nga demonyo, ingon man saba pud matod pa ang radyo sa iyang silingan nga nakahatag kaniya og kalisang.
Subay sa gihimong imbestigasyon sa BFP, pipila ka mga gamit sa panimalay ang nasunog sama sa kurtina, bangko ug uban pa, nga ang tanan gibana-bana nga mobalor sa P4,500.
Taliwa sa pagpangayo og pasaylo ni Roger, desidido ang iyaan nga mopasaka og kaso batok kaniya aron matagaan og leksyon ug makaamgo sa iyang gibuhat.
Sa kasamtangan, gitanggong na sa Mabolo Police Station ang suspek. / JDG