Usa ka Chinese national nasikop sa National Bureau of Investigation-Cebu District Office (NBI Cebdo) tungod sa giingong pagpamaligya ug pag-dispense og gihulagway nga “mislabeled” nga medical products sa usa ka Chinese supermarket nga way lisensiya usab sa pag-operate sa A.S. Fortuna Street, Brgy. Bakilid, Mandaue City niadtong Marso 22, 2023.
Giila ang suspek nga si Hu Xiang, alyas “Chang,” taga Fujian, probinsya sa China, bag-ong empleyado sa Laoxiang Supermarket sa Mandaue. Nadakpan siya sa mga ahente sa NBI nga nagpakaaron-ingnong kustomer sulod sa supermarket atol sa buy-bust.
Si NBI Mandaue agent-in-charge Arnel Pura niingon niadtong Miyerkules, Marso 29, nga gihimo ang operasyon human mahibaw-i nga namaligya og tambal nga walay pagtugot ang supermarket gikan sa Food and Drugs Administration (FDA). Ang supermarket di usab rehistrado sa Department of Trade and Industry (DTI) ug sa business licensing office sa Mandaue City Government.
Matod ni Pura nga wala usab magpakita si Chang og bisan unsang mga dokumento, sama sa pasaporte, aron pagsuporta sa validity sa iyang pagpabilin sa Pilipinas.
Mokabat sa P300,000 nga kantidad sa nagkadaiyang medical products ang nasakmit sa NBI inabagan sa FDA Regional Enforcement Unit.
Daghang mga kaso ang gipasaka batok kang Chang atubangan sa Regional Trial Court (RTC) MandaueCity tungod sa paglapas sa Republic Act (RA) 9711 o ang Food and Drug Administration Act of 2009, ug RA 10918, o Philippine Pharmacy Act sa Municipal Trial Court in Cities (MTCC) sa Mandaue.
Matod ni Pura, temporaryong nakagawas si Chang human nakapiyansa og P96,000 sa matag kaso.
Sa laing bahin, gipahibalo ni Pura nga ang tag-iya sa tindahan nagpabilin nga gawasnon ug nga ang tindahan permanente nga gisirad-an samtang nagpadayon ang imbestigasyon.