1 patay, 1 missing sa sunog sa fastcraft

Gikompirmar sa Philippine Coast Guard (PCG)-Visayas nga usa ang patay ug usa ang missing sa pasahero sa fastcraft nga nasunog sa kadagatan sa Bohol samtang naglawig padulong sa lungsod sa Bato sa Leyte gikan sa lungsod sa Ubay, Bohol kagahapon sa hapon, Hunyo 26, 2022.

Ang biktima giila sa PCG nga si Adolfo Rañola, 53, taga Barangay Poblacion, lungsod sa Trinidad Bohol, nga usa sa kapin sa usa ka gatos nga sakay sa M/V Mama Mary nga fastcraft. Sa alas 6:23 kagabii, usa na lang sa unang tulo ka mga tawo nga gikatahong missing, ang gipangita.

Sa kinatibuk-an, 99 ka mga tawo ang naluwas ug gipangdala sa lungsod sa Hilongos sa Leyte, 27 sa lungsod sa Carlos P. Garcia sa Bohol ug 35 sa Gaus Island.

Si Lieutenant Junior Grade Krysta Bergantin nagkanayon nga ang PCG-Visayas nipadala na sa barko nga MRRV-4409 aron pagtabang sa search and rescue operations.

Ang PCG wala pa mobutyag sa hinungdan sa sunog.