Usa ang patay samtang duha ang nangaangol sa disgrasya sa motorsiklo sa Barangay Quisol, dakbayan Danao, Sabado sa gabii, Hulyo 29, 2023.
Si Police Staff Sergeant Arzie Hill Biatingo sa Danao City Police, niila sa namatay nga si Vincent Rujo Bacang, 21, molupyo sa Sito Taboc, Barangay Tac-an sakop sa susamang barangay.
Samtang naangol ang duha nga mga angkas sa motor nga sila si Alther Bitoon, 43, ug Karen Agrofera, 18, pulos molupyo sa Barangay Tuburan, sakop sa Danao. Matod pa, nalabay ang duha human nibangga ang motorsiklo sa bato.
Nasayran nga ang drayber samtang nagsunay sa dalan gikan sa Barangay Togonon paingon unta pauli sa ilang panimalay, apan pag-abot na sa Quisol, ang motor nga gimaneho ni Bacang nibangga sa bato.
Human sa hitabo, ang mga biktima gipangdala sa tambalanan apan ang drayber sa motor patay nang miabot sa tambalanan human nakaangkon og bali sa lawas nunot sa kakusog sa pagkabangga.