Usa ang nakalas sa sunog sa Sityo Little Plaza, Barangay Inayawan, siyudad sa Sugbo, alas 8:16 sa buntag, Biyernes, Marso 17, 2023.
Si FO3 Fulbert Navarro, duty investigator sa Cebu City Fire Office, niila sa namatay nga si Jonado Fuentes, 52, molupyo sa dapit nga nasunogan.
Matod ni Navarro, ang gikamatyan ni Fuentes posibling ataki sa kasingkasing human giingong nihuot ang iyang dughan dihang nakakita sa pag-ulbo sa kayo sa kabalayan.
Dugang ni Navarro, nagsugod ang kayo sa panimalay sa usa ka Lorencia “Puring” Quiobe nga miresulta sa pagkaugdaw sa 24 ka mga panimalay ug miabot sa P200,000 ang danyos sa sunog.
Nasayran nga sa alas 8:23 sa buntag gisaka dayon sa unang alarma ang sunog, samtang pagka alas 8:15 sa buntag, gideklarar nga nakontrolar na ang kayo samtang pag-abot sa alas 9:20 sa buntag, napalong na ang kayo.
Matod ni Navarro, padayon pa niining sutaon kon unsa ang hinungdan sa maong sunog.(BBT)