USA ang patay samtang tulo nasikop sa buy-bust operation sa Provincial Intelligence Unit (PIU) ug Provincial Drug Enforcement Unit (PDEU) sa Cebu Police Provincial Office (CPPO) sa Sityo Caniba, Barangay Cansojong, Dakbayan sa Talisay sa Huwebes sa kaadlawon, Marso 13, 2020.
Si Police Lt. Col. Marlu Conag, pangu sa PIU, niila sa ilang target nga si Rosly Fajardo, alyas Bossing, hingkod, nagpuyo sa dapit.
Si Conag niingon nga nisukol si Fajardo hinungdan nga napugos pagbawos ang mga pulis.
Naigo sa nagkadaiyang bahin sa lawas si Fajardo.
Matod ni Conag nga si Fajardo taudtaud na nga nabaniog sa ilang barangay sa pagpamaligya ug mas naila nga boss Mark.
Makonsiderar usab si Fajardo nga high value individual (HVI) sa barangay.
Nadiskobrehan usab sa lugar ang usa ka dakong bangag nga gituohang labuganan sa basura, apan nasuta nga suyopanan.
Sa crime scene, ang mga sakop sa Scene of Crime Operatives (SOCO) nakarekober og armas nga .38 caliber revolver nga dunay kabhang nga bala ug duha ka buhing bala.
Si Fajardo nakuhaan og usa ka bulto ug 13 ka gagmay nga mga pakete sa shabu.
Tulo usab ang nadakpan sa raid, nga giilang sila si Yolando Lapena, 36; Argel Punay, 23 ug Joseph Tadeja, 31, silingan.
Si Yolando niingon nga ginagmay ra ang ilang pangbaligya nga igo nga makapalit og konsumo.
Gibana-bana usab nga moabot og P170,000 ang kinatibuk-ang kantidad sa nakuha nga shabu base sa Dangerous Drugs Board (DDB) value.
Si Cansujong Barangay Captain Vicente Oberes nga na-interview sa Superbalita Cebu, niingon nga sila si Fajardo ug tulo ka mga kauban dugay na nilang gipangbadlong. (BBT)