OPISYAL nang gisugdan ang 100-ka-adlaw nga countdown sa ika-500 ka tuig nga kasumaran sa Kadaugan sa Mactan kagahapon, Dominggo, Enero 17, 2021.
Usa ka yamo nga kalihukan ang gipahigayon sa Liberty Shrine sa Barangay Mactan nga gideklarar sa National Historical Commission of the Philippines (NHCP) isip “site of permanent display of the Philippine flag.”
Nalakip na ang Liberty Shrine sa laing mga makasaysayanong lugar sa nasod nga 24/7 na ang pag-isa sa bandila sama sa Malacañang Palace, Rizal National Monument sa Manila, Bonifacio National Monument sa Caloocan City, ug uban pa.
Usa ka flag-raising ceremony ang gipahigayon dungan sa paglubog sa adlaw nga gisundan og fireworks. Human niini subli nang gisugdan ang 100 ka adlaw nga countdown sa ika-500 nga Kadaugan sa Mactan karong Abril 27, 2021.
Ang maong adlaw gi-designate sa National Quincentennial Committee isip “D-Day of the 2021 Quincentennial Commerations in the Philippines” diin ang kasumaran sa Kadaugan sa Mactan maoy sentro niini.
Gawas sa mga opisyales sa lokal nga kagamhanan sa dakbayan ug NHCP, nitambong usab sa kalihukan kagahapon sila si Gobernador Gwendolyn Garcia, Cong. Paz Radaza, mga sakop sa kapulisan, Philippine Army, ug Philippine Air Force. (NDT)