Dili mominos 115 ka mga armas ang nasakmit sa kapulisan sa Central Visayas (CV) atol sa 11,210 ka mga Comelec checkpoint gikan sa Agusto 28 hangtod sa Oktubre 10, 2023.
Sa maong operasyon, lakip sa ilang nasakmit ang 432 ka mahait nga mga hinagiban sama sa kutsilyo ug sundang ug 60 ka mga tawo ang nangadakpan.
Sa data sa Police Regional Office (PRO 7), nakadawat usab ang kapulisan og 338 ka armas nga gitahan sa matag police stations aron ipa-safe keeping samtang nagpadayon ang mga tag-iya sa pagkuha sa ilang mga papeles.
Nakatala na usab sila og duha ka election related incidents.
Ang mga nadakpan nga naghupot og armas gipasakaan og duha ka mga kaso, kini mao ang ilegal nga paghupot og armas ubos sa Republic Act 10591 o ang Comprehensive Firearms and Ammunition Regulation Act ug Commission on Elections (Comelec) gun ban.
Matod ni Police Lieutenant Col. Gerard Ace Pelare nga pahugtan pa nila ang Comelec checkpoints aron ang tanang loose firearms dili makagawas ug mapakgang ang tinguhang kagubot sa Barangay and Sanguniang Kabataan Elections (BSKE) sa Oktubre 30, 2023.