Dili momenos 12,000 ka mga polis, sundalo ug mga sakop sa Philippine Coast Guard (PCG) ang mobantay sa nagsingabot nga Barangay and Sangguniang Kabataan Elections sa Oktubre 30, 2023.
Sila maoy mopatuman sa hugot nga siguridad sa matag tunghaan diin ipahigayon ang botasyon.
Matod ni Police Lt. Col. Gerard Ace Pelare, spokesperson ni Police Brigadier General Anthony Aberin, hepe sa kapulisan sa rehiyon 7, nga ang 9,200 ani mga polis samtang ang mga tulo ka libo mga sundalo gikan sa Visayas Command (Viscom) ug Philippine Coast Guard (PCG).
Pasabot ni Pelare nga inisyal pa lang kini samtang nagkaduol na ang election sanglit kon dunay angay nga dugangan, ilang kuhaon ang giandam nga personnel sa matag police office.
“This is an initial deployment. We will be assessing on a regular basis kon unsay kinahanglan pang i-augment kay naa man tay gina reserved kada headquarters. Diri sa regional headquarters naa tay reserved force. In other PPO’s and CPO’s we also have contingency force para kon pwede natong i-add sa mga ma identify nga mga area,” matod ni Pelare.
AREAS OF CONCERN
Sa sunod semana magsugod na ang PRO-7 sa pagpakatap sa mga police personnel diin ilang patutukan sa deployment ang 41 ka mga dapit sa Central Visayas nga gipaubos sa Comelec areas of concern.
Sa 41 ka mga lugar, 35 niini giila nga areas of immediate concern nga nagpasabot nga daghan ang mga polis nga ibutang sa maong mga barangay nunot sa insidente sa milabay nga piniliay ug ang presensya sa Communist Terrorist Group (CTG) nga nahimutang sa Negros Oriental ug Bohol.
Ang nahabilin nga unom puro areas of concern.
Kadtong bag-ong mga insidente sa pagpamusil nga ang biktima magpapili sa umaabot nga barangay elections wala pa mahilakip sa listahan sanglit gipaubos pa sa validation, sama sa nahitabo sa Balamban sa miaging semana.
Usa ka kandidato sa pagka barangay kapitan sa Brgy. Cansomoroy, Balamban gipusil patay sa riding in tandem.
“Obviously kadtong mga identified nga election areas of concern ug election areas of immediate concern there will be added security. Unya naa pud tay proactive measures nga buhaton ani nga mga areas,” dugang ni Pelare.
Usa sa ilang mga tinguha mao ang pagpakigdayalogo sa mga kandidato aron makab-ot ang malinawon ug hapsay nga piniliay.
Samtang padayon usab ang gihimong threat assessment sa tanang mga kandidato sa Central Visayas diin duna silay nailhan nga nakadawat og hulga sa ilang kinabuhi.
Dali nila kini nga gihatagan sa pagtagad pinaagi sa pagmando sa matag police station commander nga bisitahon ang maong mga kandidato aron maka apply sa security alang kanila.