Pangandoy unta sa usa ka 13 anyos nga lalaki nga ugma damlag mahimong inila sa basketball.
Apan di na niya kini makab-ot human siya nakuryentihan samtang nagduwa og basketball sa alas 6 sa gabii sa Biyernes, Pebrero 3, sa Purok San Rafael, sityo Liloy 2, Brgy. Banban, dakbayan sa Bogo, amihanang Sugbo.
Ang biktima giilang si Devanie James Dignos, nagpuyo sa dapit, namatay pipila ka oras human nadangat sa tambalanan sa Bogo City.
Si Police Sr. Master Sgt. Joel Pino, sa Bogo City Police Station nga nahinabi sa Superbalita Cebu, nagkanayon nga ang biktima uban sa iyang higala nga si John Lloyd Floron nagduwa og basketball.
Sa dihang niitsa ang biktima, wala nasulod sa ring ang bola unya didto napunta sa poste sa basketball ring.
Tungod niini, si Dignos nigukod sa bola, apan nahikapan sa biktima ang metal sa basketball post.
Nikurog si Dignos hinungdan nga iyang gibira ang iyang kamot.
Tungod niini, matud ni Pino, nawad-an ang biktima sa balanse ug natumba.
Didto napantok ang iyang ulo sa metal corner sa haligi.
Nawad-an sa panimuot ang biktima ug gidali pagdala sa Cebu Provincial Hospital-Bogo City.
Apan pipila ka minutos sa pagtabang sa mga doktor, siya nakabsan sa kinabuhi.
“Hapit naman fiesta sa ilang lugar naay gikutayng wire sa kuryerte sa poste sa basketbolan para sa suga. Unya mi-ground man, nakuryentihan ang biktima,” dugang ni Pino.
Sumala ni Pino nga nanglagom ang lawas sa biktima ug nadaot sab ang nawong ug ulo human napantok.
Sumala ni Pino nga gihulagway si Dignos nga maayong moduwa ug nangandoy nga mamahimong mainila sama sa usa ka player sa Philippine Basketball Association (PBA) nga iyang giidolo.
Ang mga ginikanan sa biktima nagtinguha nga ipaubos sa autopsy aron pagsuta kon unsa gyuy namatyan niini.