Grabe kadaghan ang mga malapason sa balaud sa trapiko sa dakbayan sa Sugbo kay sobra sa 100,000 ang naisyuhan og traffic citation tickets (TCT) sa Cebu City Transportation Office (CCTO) sa nakalabay nga duha ka mga tuig, 2021 ug 2022.
Sa 2022, ang traffic office sa Dakbayan sa Sugbo nakaisyu og 132,299 ka mga TCT, mas ubos itandi sa 139,299 sa 2021.
Sagad sa mga kalapasan mao ang pagmaneho nga expired ang rehistro sa sakyanan o way lisensya ang driver, wa pagtuman sa traffic signs sama sa no stopping ug no parking, way identification (ID) card sa CCTO, overloading sa pampublikong mga sakyanan ug uban pa.
Sa 2022, ang buhatan naka impound og 2,983 ka mga motorsiklo, 836 ka electric bikes, 73 ka mga traysikol, 166 ka pribadong mga sakyanan, 71 ka mga traysikad, upat ka public utility jeepneys (PUJ), duha ka trailers ug usa ka bus.
Tungod usab sa ilang gihugtan nga kampanya batok sa overnight parking sa publikong kadalanan, ang traffic office naka clamp og 3,911 ka mga sakyanan.
Samtang sa 2021, ang CCTO naka impound og 4,959 ka mga motorsiklo, 572 ka electric bikes, 128 ka mga traysikol, 176 ka pribadong mga sakyanan, 63 ka mga trak, 74 ka mga traysikad, 20 ka mga PUJ ug duha ka mga taxi.
Mas daghan usab sila og na clamp nga mga sakyanan sa 2021 kay niabot kini og 5,708.