PATAY ang usa ka 15 anyos nga lalake human aksidente'ng nakurentihan samtang misaka sa kisame sa usa ka building alas 10 sa gabii sa Miyerkules, Agosto 3, 2022, sa Barangay Poblacion 1, dakbayan sa Carcar, probinsiya sa Sugbo.
Ang biktima giila nga si Maiko Barawidan Canadalla, 15 anyos, taga Sityo Caipilan, sa mao'ng barangay.
Si Lieutenant Colonel Ardioleto Cabagnot, hepe sa Carcar Police Station, nga nahinabi sa Superbalita Cebu nagkanayon nga ang biktima anha mag-estambayan sa nahisgutang lugar.
Matud ni Cabagnot nga ang biktima usa ka carton boy nga magbantay sa mga sakyanan sa mga kustomer nga mopalit sa pharmacy, kan-anan, ingon man mag-internet.
Sumala niini nga nisaka ang biktima sa kisame ug nakugang na lang ang mga tawo dihang nakurentihan.
Gipadayag ni Cabagnot nga posible'ng manghilabot unta ang biktima atol sa mao'ng insidente. (GPL, TPT)