Nikabat sa 17 ka mga Pilipino ang namalik sa nasod gikan sa Sudan taliwala sa nagpadayon nga armadong panagsangka sa naasoy nga nasod, sumala sa Department of Foreign Affairs (DFA) sa Sabado, Abril 29, 2023.
Sa usa ka pahayag, ang DFA miingon nga ang 17 nga naglakip sa walo ka overseas workers ug usa ka masuso mao ang unang batch sa government-assisted Filipino evacuees.
Niabot sila sa Manila niadtong Sabado sa hapon gikan sa Athens, Greece ug Jeddah, Saudi Arabia.
Walo niini mga trabahante sa hotel sa Sudan nga misakay sa military evacuation flight human sa malampusong representasyon nga gihimo sa gobyerno sa Greece sa Philippine Embassy sa Athens.
Ang ubang mga bakwit milayas sa Khartoum agi sa Port Sudan diin misakay sila sa C130 nga eroplano sa Saudi Royal Air Force paingon sa Jeddah, Saudi Arabia.
“The OWWA (Overseas Workers Welfare Administration) provided the repatriation tickets for eight of the evacuees who are overseas Filipino workers, while the consulate arranged for the flight of the other evacuee who is a student in Sudan,” sumala sa DFA.
Si DFA Secretary Enrique Manalo kauban ang mga opisyal sa Office of the Undersecretary for Migrant Workers’ Affairs (OUMWA), Department of Migrant Workers (DMW) ug OWWA miabi-abi sa nangabot nga mga Filipino.
Giseguro ni Manalo nga ang gobyerno sa Pilipinas nagtrabaho tibuok adlaw aron matabangan ang mga Pilipino nga mibiya sa Sudan.
Siya miingon nga ang mga team nga gipangulohan sa DFA ug lakip na ang mga personahe gikan sa DMW, Owwa, Department of National Defense anaa sa yuta aron mapadali ang mga paningkamot sa pagbakwit. (SunStar Philippines)