Usa ka adlaw sa dili pa ang opisyal nga pagsugod sa academic year 2023-2024, gibana-banang 1.8 milyunes ka mga tinun-an ang naka-enroll sa tibuok Sugbo, nga natala sa Learner Information System (LIS), matod sa usa ka opisyal sa Department of Education (DepEd).
Si DepEd Regional Director Salustiano Jimenez nitug-an sa SunStar Cebu sa Lunes, Agusto 28, 2023, nga ilang gitinguha nga adunay kinatibuk-an nga 2.2 milyunes ka mga estudyante nga na-enroll karong tuiga.
Gipasabot ni Jimenez nga ang rason sa wala pagkab-ot sa gitumong nga enrollment number mao nga pipila sa mga magtutudlo, partikular sa mga tunghaan sa isla, anaa pa sa proseso sa pag-encode sa petsa ngadto sa LIS.
“Kadtong naa na sa LIS maoy giihap, mao nga naa pa tay mga 1.8 million karong panahona,” matod ni Jimenez.
Matod niya nga kini nga gidaghanon gilangkuban sa mga tinun-an gikan sa publiko ug pribadong eskwelahan, local universities and colleges (LUC), state universities and colleges (SUC), ug Alternative Learning System (ALS).
Positibo ang DepEd regional director nga maabot ang gipaabot nga gidaghanon sa enrollees sa higayon nga ma-encode na ang tanang datos sa LIS, samtang maglakat ang mga adlaw sa klase.
Ang SunStar Cebu nitaho niadtong Agusto 25, nga labing menos 1.4 milyunes ang na-enroll sa mga pampublikong tunghaan samtang 186,000 ang na-enroll sa mga pribadong tunghaan.
Gipaabot sa DepEd 7 ang 200,000 ngadto sa 300,000 ka mga tinun-an nga mo-enroll sa pribadong tunghaan karong academic year.
NAGPADAYON
Gipadayag ni Jimenez nga pabiling bukas ang enrolment bisan pa sa opisyal nga pagsugod sa klase.
“Naa tay polisiya, way bata nga mabiyaan,” matod niya.
Gipasabot niya nga adunay lainlaing mga rason kon nganong ang mga ginikanan ug guardians dili maka-enroll sa ilang mga anak sa sayo pa nga gusto nila nga mo-enroll sa laing eskwelahan.
“Usa ni sa daghang rason nganong modawat gihapon mi og enrollees bisan human sa unang adlaw sa klase,” pasabot ni Jimenez. / AML